A presente Escolma de textos galegos de don Xosé F. Filgueira Valverde non tenta ser representativa de todos os terreos (certamente numerosos) do espectro das Humanidades que frecuentou o polígrafo pontevedrés. A nosa escolla pertence ao terreo da creación literaria (lírica e narrativa) e, sobre todo, dos estudos literarios. Conxuntamente, está representada a súa ampla traxectoria xornalística, que combina erudición, curiosidade e amenidade. Os textos respectan escrupulosamente os orixinais do autor e aínda levan algunhas notas que poden ser de utilidade. Pensamos, en todo caso, na interesante dimensión didáctica e divulgativa deste libro.